Thursday, July 21, 2011

BSP S/B ( BEGULAI SEJALAI PRODUCTION SDN BHD)

SELAMAT DATAI NGAGAI RUAI BSP S/B


Orang ke ngempu BSP Sdn Bhd ianya Mr. Henry Maring Lengkong



KELANSA PUN PENGIDUP

Udah jauh ngelaban penusah bejalai enda malik ke belakang mina tinggal pengingat ke ngasuh lebih kering nujah dunya ke dikumbai orang dunya GLOBAL (nadai sempadan/nadai pengadang). Dia bisi sida madi 5 iku, ketuai lelaki udahnya tangkan lelaki baru lalu indu udahnya pia mega indu baru penudi bendar, lelaki. Siku ari sida semadi ke disebut dalam tu ianya aku empu, Lorenze Maring  ke dipadu ngadu ke Blog BSP tu. Sida (udah tu di tukar ngagai KAMI) madi tu ada di RH. MARING, NANGA RUNGAN KAKUS, TATAU, kena pegai bagi menua BINTULU dalam NENGERI SARAWAK.

Ba kenang apai enggau indai ke ngada ke kami 5 DIRI menyadi tu. Apai kami ke benama HENRY MARING AK LENGKONG diada kena 21.6.1945 lalu indai kami ke benama HILDA PETAI AK JEMAT diada kena 21.2.1959. Apai kami asal sigi orang TATAU ari menua SG. ENTAJUM, SANGAN udahnya dibai indai (niang inik kami kelia) ia mulai ke diri ke Batang Kakus bekau ke sarak enggau Niang Aki kami (Luat), lalu netap ke pendiau diri din sampai ke Niang Inik belaki baru jadi enggau Lengkong (Niang Aki). Indai kami tu asal datai ari menua Bakong (Baram) ba menua ke dikumbai orang Batu Empat Jalai Lapok, ianya asal ari rumah panjai ke dipegai apai ia empu (Aki kami sepiak indai-agi idup) ke benama TR. Jemat. Indai kami nguai ka apai kami lalu netap ke pendiau seduai ia di menua kami ke diatu, Kakus (TATAU, BINTULU). Terima kasih ngagai PETARA laban seruran merati serta merkat pejalai pengidup seduai ia sampai ke udah 41 taun idup begulai lalu ngada ke kami 5 iku diri menyadi.

KELANSA PEJALAI PENGIDUP

Kami menyadi endang baka anak mit bukai, diau di rumah panjai, nurun kumai enggau orang nebas, nugal, betambak, ngetau, belada lalu semua pengawa sebelah tanah laban sigi nadai jalai pengidup bukai, tambah mega nya sigi pengidup maya nya kelia. Taja apai kami enggau orang gawa batang, tang nadai tentu numbas ga belanja enti enda bumai & betupi. Kebuah pia, laban apai kami sigi ari kelia tajapan mayanya pemansang serta reti besekula bedau bangat tak tentu diperati ke kitai bansa, tang apai kami tetap ngeringak ngelaban semua pemedis, penusah serta pemerinsa begiga belanja dikena nyekula ke kami madi. Kami dianjung ia sekula ba SK SANGAN IBAN ( agi menkang bediri sekula nya nyentuk ke diatu ) laban nya aja sekula ke pemadu semak alai maya nya, tambah mega dia bisi pasar alai orang ngalu. Kami madi ampit sekula dia magang mula ari ia ke tuai sampai ka ia ka lumur 4 endang ngambis ke perajar ari primary 1-6. Nyadi tudah aku semina ampit sekula enda lama aja, ianya angka primary 1 aja laban ke enda betah sekula bemalam ba buding baka madi ke bukai. Meda bakanya, dia deh apai & indai bekeradai ga ngaga rumah di pasar TATAU endur nyekula ke aku pulai ari, enda bemalam da buding baka ke udah (aku sekula ba SK TATAU). Masuk ba sekula secondary tauka menengah, kami semadi besekula ba SMK TATAU. Rambau ke besekula, macam-macam penanggul ke nuntung kami sebilik, tebal agi penusah ba penyuntuk wang ringgit. Kasih meda apai kami , sema ke jaku enda pulai ari kem balak ngiga belanja nyekula ke bala anak, indai kami begaji ba urang ngetau, nebas serta bejual sayur lebuh ke beredas. Tak nadai utai enda di asai ke pemerinsa mayanya. Ukai mina penusah apai indai ke ngiga belanja aja, tang penusah ba tubuh kami empu ke kadang-kadang enda cukup duit maya ke besekula. Ai mata seruran naya maya ke enda alah tat serta maya utai asai ke enggai nyadi amat. Tang beduduk ari jaku peransang, ajar, penguat ati serta pengasih ke diberi  apai indai, kami semadi cukup kering ngelaban penguji serta meruan merening ke mua belama. Kami nanam pengingin ati ke cukup tinggi deka ngasai ke pengidup ke meruan jemah, dia deh kami bendar agi ngereja pengawa sekula. Nya alai, beduduk ari sukung apai indai, kami menyadi nerus ke singkang taja maioh penguji, tang enda mudah rebah, tenggelam, lemi serta enda putus pengarap dalam pengidup.


KELANSA UBAH PENGIDUP


Bekau ke udah numbas ia napi penguji dalam besekula dia deh pengidup nyau ga bisi ubah mimit. Udah ambis ngambi sekula secondary, sekeda ari kami menyadi bisi ga ulih nyambung sekula agai palan sekula ke tinggi. Berkat ari PETARA serta pengepuh diri, dia deh kami sebuat ulih ga enseput mimit bisi bulih kerja serta begaji bekuli baka orang bukai mega. Ulih nitih ke pemansang orang serta besemekih dalam dunya "bekerja". Nitih ke periuk asi diri, bisi nya gawa di Sibu, Kuala Lumpur, Bintulu, Johor Bahru serta di WP Labuan.

Kelansa Minat/Pengelandik Dalam Pengawa Belagu

Tiap iku kitai mensia ada ke dunya sigi diberi petara pengelandik serta nya meh ke penyadi kitai ti udah besai. Sekali agi terima kasih ke PETARA laban udah meri pengelandik ke sama ngagai kami 5 iku diri menyadi. Kami seati dalam pengelandik, minat serta tuju ti sama. Pengelandik nadai naya ke bukai, tang semina dalam dunya pemerindang. Ukai ga tak pandai serta bangat landik amai, tang diberi Petara "nemu" nyada ke lagu. Nya ti bisi dikembuan kami 5 iku tu. Lalu ti bala peninga tauka bala mayuh bisi ingat serta kala mansa pending kita, siku ari menyadi aku ianya JULIANA MARING, kala besemekih enggau orang nyada ke lagu-lagu Iban suba. Tahun 2001 album ke terubah Juliana tu dikeluar diberi nama NAMA KEBUAH NUAN BERUBAH, tahun 2002 siti dak album ti diberi nama SEBANA ATI JAUH SULU lalu taun 2003 Juliana bisi ngeluar ke album bebala enggau 2 iku dak kami menyadi ianya EDWIN MARING & SIMON MARING ti ngembuan lagu hits PEGAI TEGUH TALI SEMAYA (bisi enggau masuk AJARR suba). Semua album-album nya dikeluarka kempeni pengerikut ke tebilang, Syarikat IRAMA, Sibu. Udah bekau lebih kurang 8 taun nadai didinga rita, laban minat sigi nadai kala padam nadai kala kurang, tambah ke agi enggau sukung diri menyadi dia deh kami sebuat berunding deka "datai" baru enggau album (baik ke nya bebala mayuh tauka album kediri) keterubah tu ti diberi nama BEGULAI SEJALAI.


BSP ( BEGULAI SEJALAI PRODUCTION )

Nyangka sigi udah atur Petara, dia deh kami sebilik ditambah siku mensia ke bisi pengelandik (bisi kelansa pasal ia di baruh) nengkebang tauka bisi pengelandik nebah perengka muzik, serta meda minat ia mega cukup dalam ba pengawa tu, dia deh kami tulih ke runding merambu siti kempeni pengerikut. Bisi pengelandik ke dikembuan ia tambah ke enggau minat kami, dia deh semuanya ka nyadi dipeda. Sigi lama ga kami madi beniat jemah ila deka ngembuan kempeni pengerikut kediri laban sigi tegal minat ke cukup dalam ba dunya pemerindang tu. Meda tak ulih ngerumpang jalai munga mit, dia deh kami sama-sama ga nyingkang mungkal menalan kediri. Beduduk arinya, kami nerus ke perambu nubuh ke kempeni, lalu nya meh kebuah ada siti kempeni diberi nama BEGULAI SEJALAI PRODUCTION SDN BHD ti betuai ke Apai kami empu, serta nyadi ke tanda pun kami nerejun ke diri enggau bebendar (seriously) dalam dunya pemerindang kitai tu.


Very talented & important person:
Special One Mr. AMERIO EVAN

Nama amat ia AMERIO EVAN ANAK SANJAN (Tan Heng Hua-pernakan Cina & Iban) tang lebih dikelala serta ditemu enggau nama ABON. Ia tu meh ke disebut aku ba atas nyin tadi ke ngembuan pengelandik dalam nebah perengka muzik (Guitar, bass, drum, keyboard serta utai bukai) serta nemu tauka landik nengkebang Muzik lagu. Nya alai kami sebilik berasai beterima kasih ke Petara laban ukai semina kami nemu ia tang lebih ari nya, ia dipadu ke Petara ngikat tali pengidup (kawin) enggau menyadi kami, JULIANA. Minat seduai sama, seati, serta sepenemu dalam dunya pemerindang sigi "kombinasi" ke cukup ngam/cun. Meda bakanya, nya ti meri kami sebuat keran agi ka nubuh kempeni serta ngeluar ke album kediri.

Abon tu sigi numbas ia ga bemain muzik, serta sebarang sapa (musician serta penyanyi Iban) ti kala enggau ia bemain tauka ke kala diiring ia dalam konset, sigi ngelala Abon tu. Jarang endar ga menua kitai Sarawak bedau alai ia bemain muzik serta nyampau amat ga penyanyi kitai bansa udah kala diiring ia dalam konset.

Abon tu meh ke megai tanggung pengawa paling besai dalam BSP, laban ia meh ke Programming Lagu, nyaga maya ngerikut,  "mixing" serta Mastering album kami sebuat. Enti nadai ia, bedau temu BSP tu ulih pegari serta besemekih dalam dunya pemerindang. Di tambah ke agi enggau menyadi aku, Juliana ke mayuh nengkebang lagu (tiun) serta leka ke lagu-lagu BSP, nya ti asai ke ngelengkap ke kami sebuat deka nubuh ke BSP. Sempama ke "ngantuk disurung ke panggal" amat.


Juluk ati BSP (Long term Planning):
  1. Mai ubah enggau cara belubah dalam muzik lagu-lagu kitai Iban.
  2. Mai ubah enggau cara belubah dalam 'editing' video klip lagu Iban.
  3. Nguji ka tusun (arrangement) muzik lebih mayuh tauka bemacam-macam agi.
  4. Nguji berimba/nebas/ngerandang jalai kena mai muzik kitai ngagai tikas ke lebih tinggi agi.
  5. Ngerembai ka cabang/bansa pengawa bukai ka besangkut paut enggau dunya pemerindang ngambi kechunto, merambu deka ngaga Biografi pemerindang lama, dokumentari Iban, ngaga drama Iban lalu enti bisi  rejeki tau ngeluar filem.
  6. Nguji ngaga kaul enggau kempeni-kempeni ke besai serta jelai tampak rita dalam dunya pemerindang Sarawak enggau ba tikas dalam Malaysia mega dalam bejalai ke pengawa ke bekait enggau dunya pemerindang (dunia seni).
  7. Serta muka mata kitai bansa nitih ke bansa bukai meri sukung ngagai semua ka gawa tauka semua pemerindang Dayak anang meda pemajik & penyigat, pemanah tubuh serta pemanah kulit. Tang mai kitai muka mata sama meri sukung tegal pengelandik, pemanah patah nyawa siku-siku penanyi, pemanah lagu, kualiti tusun muzik serta nyukung sebarang sungkak pemaju dalam dunya pemerindang kitai.
(deka ditambah ke ari maya ke maya)



Tanda terima kasih ari kami:-

Baka kami sebuat ke agi kelalu baru dalam dunya pemerindang tu, sigi arap ke sukung kitai mayuh. Ke tanda terima kasih ngagai bala mayuh ke lebih agi bala peninga lagu-lagu Iban, kami deka datai  merindang semua enggau ngeluar ke album keterubah ari BSP, ianya album Kompilasi kami madi ti dijangka pansut dalam ujung tauka pun taun 2012 ila. (Agi mengkang dalam proses). Arap ke bala mayuh meri sukung ke kami sebuat.

Lalu pia mega, enda ditinggalka ngagai bala kaban belayan, bala aya, bala ibu, bala petunggal, bala anak, bala aki ini sereta bala bakih ka ke seruran meri sokong sereta peransang ngagai kami menyadi dalam dunya pemerindang tu, kami meri besai terima kasih ngagai kita semua. Nya alai kena malas sokong bala kita, dia deh kami menyadi lalu berunding mupuk ngerayap begadai-gadai ngadu ke pengawa tu.

Ke penudi, aku nusun jari sepuluh minta ampun sema jaku aku dalam latar belakang Blog serta keseluruhan Blog tu bisi enda nyamai dibaca tuaka didinga serta enti bisi leka jaku becampur mimit, ukai reti aku sengaja, tang aku deka berajar ari penyilap, pengurang serta penyalah. Tu mega keterubah ia aku ngaga blog, nya alai agi mayuh utai ka diperajar. Blog tu deka di ubah tauka "dikemaskini" ari maya ke maya.

Terima Kasih.
Dikarang,

LORENZE MARING
Editor
BEGULAI SEJALI PRODUCTION SDN BHD

18 comments:

JULIANA MARING said...

nice...good try

Anonymous said...

manah...teruskan

JULIANA MARING said...

terima kasih wai...

ody09 said...

rindu maca blog kitak gat...terus ka update blog tok..tambah info2 baru- pasal BSP,gambar serta utai bukai..ngambi ka lebih agi manah ari ke diatu....ngarapka kitak terus mujur dalam dunya pemerindang

Anonymous said...

Excellent blog...quite impressive..keep up the good work!

JULIANA M. said...

Ody09

Ba blog archive bisi meruan tajuk ruangan gambar, promo serta video link ari youtube. Termasuk berita surat kabar ke udah kala pansut pasal BSP tu meh gat. Tau cek ba setiap tajuk archive...nitih ke bulan ba baruh list follower nya....

JULIANA M. said...

Anonymous (enda pasti sapa laban nadai appear nama)

Terima kasih. Info ke baru2 tau dipeda ba tajuk archive "mansa pending"....

JULIANA M. said...

Blog tu igi deka di update ngagai maya ke maya. Terima kasih laban udah nemuai auk....tetap ka sukung auk..

JULIANA M. said...

udah mayuh ruangan2 ke udah di isi...tau klik ba archive nitih ke bulan sepiak kiba (facing laptop or PC)......macam2 udah bisi auk...TQ

pengayau said...

Tahniah BSP! Pengangkat BSP tok meh ke tanda menua kitai nang sigi maju ari semua segi ukai semina ba pengawa rumah, pengawa sekula aja.Ngau ati gaga, terima kasih and kami semampai nyukung BSP dalam kareer ke dudi ari ila

BSP S/B said...

Pengayau...

Terima kasih gat auk. Terima kasih ke sukung auk. Tak naka ulih meh kami sebuat tu ngerayap ngeradai nitih ke gaya orang.....arap ke petara malik ngagai nama utai ti dikerja kami sebuat tu..ngarap ke nuan mega mujur dalam semua pengawa auk..gerai belama..GBU..

SejutaNafasCinta said...

Ngarap kita semadi mujur dlm dunya pemrindang..

BSP S/B said...

terima kasih mayuh auk....

Boytattoo said...

all the best ngagai kita menyadi...

BSP S/B said...

Boytattoo

Terima kasih madi auk....sama bela all the best mega agai nuan neh...BSP

Anonymous said...

Sinu ati maca blog kitak...bangga bisi mega...

BSP S/B said...

terima kasih...semina kelansa aja kena ngingat ke diri agi bediri ba tanah/dunya nyata...

Anonymous said...

hiya begulaisejalaiproduction.blogspot.com blogger discovered your website via Google but it was hard to find and I see you could have more visitors because there are not so many comments yet. I have discovered website which offer to dramatically increase traffic to your blog http://mass-backlinks.com they claim they managed to get close to 4000 visitors/day using their services you could also get lot more targeted traffic from search engines as you have now. I used their services and got significantly more visitors to my website. Hope this helps :) They offer most cost effective services to increase website traffic at this website http://mass-backlinks.com