TAUN 2014
D' HATTA BAND
Sepengelama setaun lebih BSP diau diri nadai mansutka produk. Ditambahka mega ditinggang penusah pemati menyadi kami ke biak bulan Semilan (September 2013) taun nyin kemari, nambahka agi BSP ka diau diri laban bedau nyamai alai begagaka produk.
Taun 2014 tu, perambu mansutka SINGLE ari siti gerup diberi nama D' HATTA BAND deka diteruska bekau projek tu ke lama udah ditangguhka. Penyada (vocalist) asal gerup tu suba ianya niang Lorenze Maring. Maya projek tu deka dipenyadi, tak enda mukai-mukai tudah ninggal ka kami dalam penusah ba jalai alun. Nya siti ari kebuah projek tu betangguh lama.
Single/siti lagu pengelala (introduce song) udah ba ikas ka penudi mixing & mastering. Lagu tu tau mega dikumbai berentak modern pop rock deka dianjung ngagai stesen-stesen radio awakka belabuh dipasang serta nyangka dipasukka dalam youtube ianya siti cara dikena mansutka mua/gerup sida D' Hatta Band tu.
Kami BSP ngarapka sukung ari peninga lagu-lagu kitai bansa, awakka pengawa tu tau nyadi siti ari cara kitai bekunsi ke ubah / pemansang muzik dalam industri kitai. Sigi amat tusah ba kami ngemai ubah muzik ke lebih manah agi laban bedau semua peninga kitai bansa ulih nerima semua tu. Kami kala dikumbai orang "syok sendiri" tegal ubah muzik ti dibantaika/dibai bedau ulih diterima bala mayuh. Tang semua nya ukai ngelemi ka kami, tang majak ngeringka kami deka nyingkang ka mua. Laban ukai ngira untung ba duit gegelik (semata-mata). Tang deka sama-sama ngerami dunya pemerindang.
Kami beterima kasih ngagai semua sukung peninga ngagai produk kami ka udah-udah. Mayuh ga diterima ba sesebangkah menua taja enda semua. Kami arap, kitai bansa anang berunding baka ka udah, sama-sama meh kitai muka mata & pikir kitai maju ka mua agi.Tajapan ka diatu, kitai bedau bisi saluran dikena mai muzik kitai besemekih sebaris enggau muzik-muzik bansa bukai ke udah dulu jelai beberita keluar kin. Tang, ke patut ia, sukung ari bansa / kemuniti kitai empu cukup bereti serta beguna nyadika pengering kitai lebih maju. Beduduk ari urat ti kuat, kitai tau bediri dedegi baka orang bukai.
Enda nyalah-nyalah baka muzik rock ba terubah pengerembai ia suba ti tusah diterima mensia mayuh, sampaika sida penanyi-penanyi rock tusah ngiga makai. Bakanya mega pengawa kami ka ngiga endur (tapak) ba ati peninga kitai bansa. Muzik baru ka dibai Band / gerup kitai diatu, ukai muzik ti pedis didinga tauka ti ngembuan leka ka enda nyamai dipendingka, tang muzik pop ka suah didinga kitai enti gerup/band luar ngemai/nyadaka ia. Kitai rinduka lagu-lagu ari gerup luar baka ari Indonesia, Semenanjung serta orang putih, tang, nama kebuah kitai enda rindu enti gerup ari bansa kitai empu ka mai muzik sama bakanya?. Nama kebuah?. Alasan ka suah di dinga ianya, laban kitai bansa bedau ulih nerima ubah muzik bakatu, bakanya, bakanyin serta pasaran kitai lebih laku ba orang-orang rumah panjai ke rinduka rentak dangdut biasa baka ka selama tu didinga kitai. Amat. Amat pasaran kitai laku agi ba entara orang-orang rumah panjai/menua ulu sungai/pedalaman, tang diatu udah mayuh mega kitai bansa mindah gawa serta diau di nengeri. Tinjau ari "penghijrahan" kitai bansa ari menua ulu ngagai nengeri enda bangat tinggal ari bansa bukai, tang dini penanggul kitai pedis ka nerima ubah dalam muzik?. Dani meh kitai menyadi semua. Dani kitai lalu angkat nitihka orang.
Nya alai, pulai agai muzik rock ke tusah diterima ba atas nyin tadi, diatu, muzik rock siti ari muzik ke paling engkeman ba ati mensia mayuh nyengkaum kitai bansa. Jarang enda nemu lagu-lagu rock kapak ari sida Sweet Charity, Wings, Search, Qiara, Wow, Illusi enggau ke bukai, dipelabaka nyau ka semua nemu sema enda mayuh, siti dua lagu sigi bisi nemu. Bakanya mega utai dikarapka kami, bisi maya ila, muzik baru deka engkeman diterima dalam ati peninga kitai bansa. Nya alai, ukai kami BSP & D' Hatta Band aja ti napik penanggul tu pelaba aku, gerup/kempeni bukai mega sama, arinya kitai besabar meh dulu enggau penerimaan orang mayuh. Ila, bisi maya muzik baru ka dibai kitai nya deka diterima semua.
Kitai sama-sama nyingkang lalu sama-sama ngarapka peninga nyukung kitai dalam semua tu. Taja pedis diatu ba kitai, tang laban kitai bansa sigi bansa ka mereti, pandai & regas, bisi maya ila, muzik & penyada kitai bansa sigi ulih diterima & besemekih.
IDUP KITAI BANSA!!!..MAJU MUZIK KITAI!!!....
BSP mantai ke pengaga ati mai ngagai kita bala peninga promosi album keterubah ti diberi nama BEGULAI SEJALAI. Album tu ianya album Kompilasi kami diri menyadi. "Semina deka nguji" ngica ke bisi ditela serta dipeda kitai mayuh.
Album keterubah tu ngundan 10 iti lagu ti dijangka tau ngerindu ke ati bala peninga mayuh. 10 iti lagu-lagu nya diberi nama:-
a) ENDA BETAH disadaka Juliana maring
b) ASI UDAH NYADI BUBUR disadaka Simon Maring
c) MUTUS ATI disadaka Moreen Maring
d) ANDAL disadaka Edwin Maring
e) MENALAN SUNYI disadaka Lorenze Maring
f) MERINSA disadaka Moreen Maring
g) PESAN NGAGAI ANEMBIAK disadaka Simon Maring
h) KEMARI disadaka Lorenze Maring
i) SANGGUP NEBANG SANGGUP NGESAN (SNSN) disadaka Edwin Maring
j) BEGULAI SEJALAI disadaka semua (duet)
Sekeda ari munyi sada BSP ("teaser" pandak):
pending ke sekeda ari munyi lagu-lagu BSP.
Meri besai terima kasih ngagai semua ke bisi nemuai agai blog kami tu serta ke udah muka lambar promosi BSP tu. Arap ke bala peninga ke rindu ati deka ninga album tu sampai abis, meli ke ORIGINAL. Anang meli ke disalin (cetak rompak). Kelimpah ari sama bela nagang/ngurang ke pengawa nyalin VCD lagu-lagu Iban, kita mega deka berasai puas meda kualiti ke ORIGINAL
TAUN 2012
Hello semua peninga-peninga lagu IBAN, kami BSP bisi berita manah deka dipadahka ngagai kitak semua. Dalam urung ia bulan 10 taun tu, BSP deka mansut ke album baru JULIANA MARING. Album tu, album solo JM kediri aja ti ngundan 8 iti lagu. Peda promo lagu-lagu baru JULIANA MARING ba LINK di baruh tu:
ENDA NYERAH ALAH
PALAN BUAH KENANG
Lagu-lagu dalam album baru JULIANA MARING dijanjika ulih narit ati kitai ke ninga. Album tu mega ngundan bemacam-macam rentak lagu. Anti meh penatai JM pulai ngagai dunya pemerindang kitai Sarawak.
.
"SUKUNG MEH PEMANSANG DUNYA PEMERINDANG KITAI"
Dikarang,
Lorenze Maring
Editor BSP
