DAGANG BUKAI????

BSP bisi atur deka ngujika nasib serta ngerembaika bansa dagang ka bukai kelimpah ari ka mansutka album-album lagu belabuh ari 2014 tu mega. BSP benung dalam perambu ngujika nasib dalam bedagang ka barang bukai ianya bejual VCD album-album lagu Iban, Melayu (nyengkaum lagu ari penyada Indonesia), album lagu-lagu ribai serta ba kedai ka sama nya deka mega bejual ka garik / pakaian ka pisin baru ti dikerinduka orang mayuh kemaya ari.

Enggau peluang tu, BSP nesau bala kempeni-kempeni pengerikut kitai bansa, tau mega nganjung / deal enggau cara terus enggau kami enti deka nguna kedai kami bejualka VCD album-album ka dipansutka kempeni-kempeni kitai dayak. Kami nyukung dagang VCD ti chulin (Original). Tu siti peluang kitai nyual VCD ka chulin. Anang kakang ati wai menyadi semua, laban tu mega peluang kitai ulih belakuka product kitai sama-sama.

Kedai BSP tu bepalan ba Pasar Baru Tatau (Giga signboard BSP), nunga orang ka bejual candut & alai van sua parking. Kedai tu besais mit aja.

Kami ngarapka kitai bala mayuh sama bela nyukung pengawa BSP tu awakka bansa kitai sama-sama ulih maju baka orang bukai.

Nya alai, kedai tu ila gabungan butik & kedai VCD. Ka diatu, kedai tu benung dalam pengawa ka ngadu, ngeripair, ngecat, ngelekatka rak & alai ngantung baju-baju serta utai bukai mega. Tang dipelabaka enda bangat lama da agi, kedai tu deka belabuh dibuka ngagai orang mayuh.

Datai meh bebala mayuh, semua utaika dijual dijamin dalam kandang rega ka ulih dibelanjaka kitai. Pisin garik ka baru-baru, bisi dijual munga mit ba kedai tu. VCD chulin mega bisi dijual ditu ila.

Kami minta berkat Tuhan meruan enggau kami dalam ngereja semua pengawa, awakka semua utai dikereja mujur & nitihka peneka IA magang. Lalu, awakka jereki ti di ulih ari semua utai dikereja kami, nyadi jereki ka diberkat Allah Taala. Amen.

MENYADI SEMUA/ PENINGA MAYUH, aram meh kitai sama mansang enggau cara besukung pangan diri.

TAUN 2014

D' HATTA BAND

Sepengelama setaun lebih BSP diau diri nadai mansutka produk. Ditambahka mega ditinggang penusah pemati menyadi kami ke biak bulan Semilan (September 2013) taun nyin kemari, nambahka agi BSP ka diau diri laban bedau nyamai alai begagaka produk.

Taun 2014 tu, perambu mansutka SINGLE ari siti raban band diberi nama D' HATTA BAND deka diteruska bekau projek tu ke lama udah ditangguhka. Penyada (vocalist) asal raban tu suba ianya niang Lorenze  Maring. Maya projek tu deka dipenyadi, tak enda mukai-mukai tudah ninggal ka kami dalam penusah ba jalai alun. Nya siti ari kebuah projek tu betangguh lama.

Single/siti lagu pengelala (introduce song) udah ba ikas ka penudi mixing & mastering. Lagu tu tau mega dikumbai berentak modern rock deka dianjung ngagai stesen-stesen radio awakka belabuh dipasang serta nyangka dipasukka dalam youtube ianya siti cara dikena mansutka mua/gerup sida D' Hatta Band tu.

Kami BSP ngarapka sukung ari peninga lagu-lagu kitai bansa, awakka pengawa tu tau nyadi siti ari cara kitai bekunsi ke ubah / pemansang muzik dalam industri kitai. Sigi amat tusah ba kami ngemai ubah muzik ke lebih manah agi laban bedau semua peninga kitai bansa ulih nerima semua tu. Kami kala dikumbai orang "syok sendiri" tegal ubah muzik ti dibantaika/dibai bedau ulih diterima bala mayuh. Tang semua nya ukai ngelemi ka kami, tang majak ngeringka kami deka nyingkang ka mua. Laban ukai ngira untung ba duit gegelik (semata-mata). Tang deka sama-sama ngerami dunya pemerindang.

Kami beterima kasih ngagai semua sukung peninga ngagai produk kami ka udah-udah. Mayuh ga diterima ba sesebangkah menua taja enda semua. Kami arap, kitai bansa anang berunding baka ka udah, sama-sama meh kitai muka mata & pikir kitai maju ka mua agi.Tajapan ka diatu, kitai bedau bisi saluran dikena mai muzik kitai besemekih sebaris enggau muzik-muzik bansa bukai ke udah dulu jelai beberita keluar kin. Tang, ka patut ia, sukung ari bansa / komuniti kitai empu cukup bereti serta beguna nyadika pengering kitai lebih maju. Beduduk ari urat ti kuat, kitai tau bediri dedegi baka orang bukai.

Enda nyalah-nyalah baka muzik rock ba terubah pengerembai ia suba ti tusah diterima mensia mayuh, sampaika sida penanyi-penanyi rock tusah ngiga makai. Bakanya mega pengawa kami ka ngiga endur (tapak) ba ati peninga kitai bansa. Muzik baru ka dibai Band / raban kitai diatu, ukai muzik ti pedis didinga tauka ti ngembuan leka ka enda nyamai dipendingka, tang muzik modern rock ka suah didinga kitai enti raban / band luar ngemai/nyadaka ia. Kitai rinduka lagu-lagu ari raban luar baka ari Indonesia, Semenanjung serta orang putih, tang, nama kebuah kitai enda rindu enti raban ari bansa kitai empu ka mai muzik sama bakanya?. Nama kebuah?. Kebuah ka suah di dinga ianya, laban kitai bansa bedau ulih nerima ubah muzik bakatu, bakanya, bakanyin serta pasaran kitai lebih laku ba orang-orang rumah panjai ke rinduka rentak dangdut biasa baka ka selama tu didinga kitai. Amat. Amat pasaran kitai laku agi ba entara orang-orang rumah panjai/menua ulu sungai/pedalaman, tang diatu udah mayuh mega kitai bansa mindah gawa serta diau di nengeri. Tinjau ari "penghijrahan" kitai bansa ari menua ulu ngagai nengeri enda bangat tinggal ari bansa bukai, tang dini / nama penanggul kitai pedis ka nerima ubah dalam muzik?. Dani meh kitai menyadi semua. Dani kitai lalu angkat nitihka orang. 

Nya alai, pulai agai muzik rock ke tusah diterima ba atas nyin tadi, diatu, muzik rock siti ari muzik ke paling engkeman ba ati mensia mayuh nyengkaum kitai bansa. Jarang enda nemu lagu-lagu rock kapak ari sida Sweet Charity, Wings, Search, Lefthanded, Damasutera, Qiara, Wow, Illusi enggau ke bukai, dipelabaka nyau ka semua nemu, sema enda mayuh, siti dua lagu sigi bisi nemu. Bakanya mega utai dikarapka kami, bisi maya ila, muzik baru deka engkeman diterima dalam ati peninga kitai bansa. Nya alai, ukai kami BSP & D' Hatta Band aja ti napi penanggul tu pelaba aku, raban/kempeni bukai mega sama, arinya kitai besabar meh dulu enggau penerimaan orang mayuh. Ila, bisi maya muzik baru ka dibai kitai nya deka diterima semua. 

Kitai sama-sama nyingkang lalu sama-sama ngarapka peninga nyukung kitai dalam semua tu. Taja pedis diatu ba kitai, tang laban kitai bansa sigi bansa ka mereti, pandai & regas, bisi maya ila, muzik & penyada kitai bansa sigi ulih diterima & besemekih.

IDUP KITAI BANSA!!!..MAJU MUZIK KITAI!!!....

"AKU TU TI PENGANGKAT ENGGAU PENGIDUP, BARANG SAPA TI ARAPKA AKU, DEKA IDUP TAJA IA MATI" John. 11:25

Kena 29.09.2013, pukul 12.50 tengahari, ta' asaika petang tegayam, bejalai enda belantai, dada asaika dipandam, siang asaika malam meh kami sebilik nerima berita pemati menyadi asi kami Lorenze (Lawrence) Maring. Ta' enda disangka-sangka, nadai tepadahka nyawa, nadai disagi-sagi meh menyadi asi kami ngejang ke menua enda pulai agi. 

Asaika ngetu putar dunya, meki pusin jam serta teketu silih malam enggau siang laban penusah ke paling pedis ditapi' tu. Ia ka diasi, diandai, disayau serta paling biak kering, ia ga ka dulu pegi ninggalka kami & dunya. 

BSP sebilik (nyengkaum sepiak entua ia) berasai puang serta berasai "lenyau" barang paling berega ba dunya ditinggalka niang Lorenze midang nengali' ari, sulai nengali' lemai. 

Sada nyawa, gambar-gambar serta video niang sekumbang ke udah di dalam dunya pemerindang, taja semina setaun jagung aja, meruan ngasuh ati beraie. Semua pengawa BSP, nadai enda bekau jari ia, nya ti meri kami sinu amat. Diatu, kami agi pedis napi' semua tu, tang kami pecaya, ila, semua tu nyadika pengingat paling manis serta ke disimpan dalam ati kami nyentukka seput padam datai maya Petara mega ngambi kami baka ia ti ngambi niang tu.

Nyadi pemati niang tu, ngambika bala mayuh sama nemu, niang tu nadai bebadi ba jalai alun. Maya niang enggau 3 iku da' kaban ia bemoto sikal ba Keningau, Sabah. Mayanya, niang ngena motosikal Yamaha FZ 1000cc ke baru sebulan udah dibeli (moto lama ia Yamaha R1), penusah ti deka nyadi sigi nadai disadang lalu nabanka nyawa ia. Bakanya meh munga mit gaya pemati ia.

Lorenze tu meh ti nengkebang blogspot BSP tu. Diatu, dini bisi ia agi ngereja pengawa tu?. Aku, Juliana ngambi tanggung pengawa tu, nyambung utai ti udah di pun ka ia suba. Enda nemu aku nyema' ka asai ati ti kelalu sinu serta agi bedau nyamai mayaka ngaduka artikel tu. 

"Mau, dini alai aku minta tulung ngaduka utai bakatu agi?. Nuan baka ka nemu diri enda gayu, semua utai udah di pun ka nuan memagang. Bekau ba BSP, anak bini nuan, apai indai, kitai menyadi serta ba pengidup nuan empu...(pengawa tetap & nyambung perajar)...semua udah di pun ka nuan magang. Udah semua nya ulih nuan, Tuhan pan lalu ngambi nuan. Baru kami sedar, nuan dipinjauka Tuhan ngagai kami, udah pengawa nuan tembu, nuan pan PULAI. Nadai ke ganti nuan mau..."

Sama-sama meh kitai besampika roh niang, awakka ia diau lantang di menua amat din.

Lalu nengah peluang tu, kami sebilik meri besai terima kasih ngagai bala kaban belayan ke datai ari jauh tauka semak ti sama bela tusah ngesah penusah kami maya tu suba. Kami bebasa serta berasai terhutang budi ngagai kita semua. Terima kasih semua.

Igat mit (kangau asi ba kami sebilik), nuan udah nyata diau lantang din, anang nuan enda ingatka kami ka agi idup di menua tu. Kami meruan besampi laban semina nya aja cara kami semak enggau nuan lalu nyempulang pendiau nuan ti meruan di dunya KEKAL.

RIP my little brother Lawrence Maring. (Ada: 23.04.1988, Mati: 29.09.2013, umur 25 taun).

By,

Juliana Maring

22.02.14