"AKU TU TI PENGANGKAT ENGGAU PENGIDUP, BARANG SAPA TI ARAPKA AKU, DEKA IDUP TAJA IA MATI" John. 11:25

Kena 29.09.2013, pukul 12.50 tengahari, ta' asaika petang tegayam, bejalai enda belantai, dada asaika dipandam, siang asaika malam meh kami sebilik nerima berita pemati menyadi asi kami Lorenze (Lawrence) Maring. Ta' enda disangka-sangka, nadai tepadahka nyawa, nadai disagi-sagi meh menyadi asi kami ngejang ke menua enda pulai agi. 

Asaika ngetu putar dunya, meki pusin jam serta teketu silih malam enggau siang laban penusah ke paling pedis ditapi' tu. Ia ka diasi, diandai, disayau serta paling biak kering, ia ga ka dulu pegi ninggalka kami & dunya. 

BSP sebilik (nyengkaum sepiak entua ia) berasai puang serta berasai "lenyau" barang paling berega ba dunya ditinggalka niang Lorenze midang nengali' ari, sulai nengali' lemai. 

Sada nyawa, gambar-gambar serta video niang sekumbang ke udah di dalam dunya pemerindang, taja semina setaun jagung aja, meruan ngasuh ati beraie. Semua pengawa BSP, nadai enda bekau jari ia, nya ti meri kami sinu amat. Diatu, kami agi pedis napi' semua tu, tang kami pecaya, ila, semua tu nyadika pengingat paling manis serta ke disimpan dalam ati kami nyentukka seput padam datai maya Petara mega ngambi kami baka ia ti ngambi niang tu.

Nyadi pemati niang tu, ngambika bala mayuh sama nemu, niang tu nadai bebadi ba jalai alun. Maya niang enggau 3 iku da' kaban ia bemoto sikal ba Keningau, Sabah. Mayanya, niang ngena motosikal Yamaha FZ 1000cc ke baru sebulan udah dibeli (moto lama ia Yamaha R1), penusah ti deka nyadi sigi nadai disadang lalu nabanka nyawa ia. Bakanya meh munga mit gaya pemati ia.

Lorenze tu meh ti nengkebang blogspot BSP tu. Diatu, dini bisi ia agi ngereja pengawa tu?. Aku, Juliana ngambi tanggung pengawa tu, nyambung utai ti udah di pun ka ia suba. Enda nemu aku nyema' ka asai ati ti kelalu sinu serta agi bedau nyamai mayaka ngaduka artikel tu. 

"Mau, dini alai aku minta tulung ngaduka utai bakatu agi?. Nuan baka ka nemu diri enda gayu, semua utai udah di pun ka nuan memagang. Bekau ba BSP, anak bini nuan, apai indai, kitai menyadi serta ba pengidup nuan empu...(pengawa tetap & nyambung perajar)...semua udah di pun ka nuan magang. Udah semua nya ulih nuan, Tuhan pan lalu ngambi nuan. Baru kami sedar, nuan dipinjauka Tuhan ngagai kami, udah pengawa nuan tembu, nuan pan PULAI. Nadai ke ganti nuan mau..."

Sama-sama meh kitai besampika roh niang, awakka ia diau lantang di menua amat din.

Lalu nengah peluang tu, kami sebilik meri besai terima kasih ngagai bala kaban belayan ke datai ari jauh tauka semak ti sama bela tusah ngesah penusah kami maya tu suba. Kami bebasa serta berasai terhutang budi ngagai kita semua. Terima kasih semua.

Igat mit (kangau asi ba kami sebilik), nuan udah nyata diau lantang din, anang nuan enda ingatka kami ka agi idup di menua tu. Kami meruan besampi laban semina nya aja cara kami semak enggau nuan lalu nyempulang pendiau nuan ti meruan di dunya KEKAL.

RIP my little brother Lawrence Maring. (Ada: 23.04.1988, Mati: 29.09.2013, umur 25 taun).

By,

Juliana Maring

22.02.14